El testamento ològrafo del Carneval de sto ano

Documenti

La mattina di mercoledì delle Ceneri, 9 marzo, davanti al Municipio di Trieste (detto Palazzo Cheba, cioè gabbia, per struttura architettonica e non perché contiene i merli e pappagalli della politica) il Gruppo del Carnevale spontaneo ha dato lettura del testamento olografo – cioè scritto di suo pugno – del Carnevale defunto. Vista la rilevanza del documento, delle disposizioni e dell’eredità, ne pubblichiamo all’istante il testo, sul quale sono state anche improvvisate in piazza delle variazioni.

_____________

Disi la lege che ogni testamento devi eser reso publico dai eredi. E noi alora semo qua per render publico el testamento che ne ga lasà scrito el nostro povero pare Carneval, oramai morto. Legendoghelo in piaza granda o picola, davanti o dedrìo dela Comùn, a quei che xe, a quei che no xe, a quei che scolta e che no i vol scoltàr, e per tuti ala bora, che la sia o no la sia. Eco alora el suo  testamento:

Cari fioi e fie mii, legitimi, ilegitimi o de qualchedun altro! Queste xe le mie ultime volontà, scrite giusto prima de andàr dove che voi no me vegnaré drio.  Ma sicome che son povaro e no go bori e roba de lasarve, ve laso quel che go: un poche de verità e de speranze. Che forsi le val anca de più.

Come che se sa, le barabe no le mori quasi mai. Perché no i le vol gnanca de l’altra parte, dove che i xe meno mone de noi, che inveze se le tignimo dandoghe onori e poteri in cambio de quatro bale e tre floce.

Mentre che mi, povaro Carnevàl, son onesto e sincero. Perché meto in maschera almeno una volta ogni ano le verità che xe drio le bugìe de ogni giorno. Ridendo e fazendo fraia per no pianzer.

E propio per questo a mi inveze me toca de viver poco, e de morir, ogni ano. Perché chi che comanda de là me vol tanto ben, quanto che me vol mal quei che comanda de qua, specialmente nela nostra bela ma bastonada Trieste.

Ma el bon xe che mi ogni ano anca torno, e per quanto che me sia curta la fraia vedo e capisso tante robe che no le va. E cusì poso anca lasarvele de giustàr a voi, qua in testamento.

Quel che go visto sto ano xe propio de pianzer. Mentre che i soliti politici i continua a bambàr monade e a farse i sui ludri afari coverzendose un col altro, la zente sta sempre pezo, e la zità la mori ogni giorno de più.

Disocupaziòn de omini e done, giovini e adulti, con poche speranze. Le fabriche sera o licenzia, e ogni giorno sparisi due, tre, diese boteghe, lasando senza lavòr dipendenti e paroni. Familie e veci in miseria, che devi scelzer tra magnàr e farse taiàr la luce. Mulerìa che se dispera, se sera drento i sui problemi o la se buta malamente.

E nisùn de quei che comanda scolta sul serio tute ste persone e anime in dificoltà. Nisùn de lori no li iuta in concreto. Anzi, i fa finta che no le esisti. E i ne conta adiritura che semo quei che sta meio in Italia. Ma alora diseme come che sta quei che sta pezo!

La verità xe che sta sempre meio i pochi che ga i bori e comanda, e sta sempre pezo tuti quei che inveze i subisi. E che per viver i devi lavoràr, ma el lavor manca, e pensar al futuro suo e dei fioi, ma manca anca quel.

Qualchedùn disi che chi che comanda Trieste xe come quei che balava sul Tìtanic. Ma no xe cusì, perché Trieste no la naviga più oramai de ani anorum. E in ogni caso quei siori, o pedoci refài, i ga sempre le sialupe pronte per lasàr che se neghemo solo che noi.

Tanto i sa che qua no usemo far rivoluzioni, e gnanca no morsighemo: al masimo se rugna, scondendo la miseria per nostra dignità. Dignità che lori no par che i sapi gnanca cossa che xe, altrimenti no i poderìa guardarse in specio de matina.

Perchè sto ano pasà no ghe bastava continuàr a fregarsene dei nostri problemi ridendo, magnando a spese nostre e contandone le solite floce. No: i ne ga fina dà ai speculatori edili el Porto vecio, dopo averlo svodà. Che inveze usado come quel che el xe, cioè la nostra zona franca più granda, el ghe podarìa dar lavor a tuti, dal tecnico al operaio.

Ma anca el resto del porto, franco e normale, continua a crepàr in man de gente che no xe gnanca per barca. Mentre che in rada ne naviga più che altro pantigane, co’ le se nega nele fogne tra piova e alta marea.

Intanto come che canta la marinaresca, Trieste dormi e el mar se movi apena. Fina in Palazo de Giustizia, dove che el povero rubapolastri no se la cava mai fazile, ma el sindaco par che gabi tratamento speciale. Dato che i ga zà de un ano e mezo le prove che el se ga magnà un terèn comunale, e che tuti i ufici e i altri politici lo sta coverzendo.

Tuto questo per dir almeno qualcheduna dele porcherìe più grande che go visto, prima che me tochi taser e finir sepelì anca sto ano. Ma el prosimo sarò de novo qua, povaro e sincero come sempre, perchè almeno mi vedo ciare le robe, e no magno memoria. E per speranza mia e vostra ve laso dito anca come comportarve intanto che torno.

Primo, ricordeve che per cambiàr e tirarse fora de sto ludame no basta lamentarse, e gnanca sfogarse in carnevàl una volta al ano. Ocori inveze sveiarse, e avèr almeno el ciàf e el coragio de butar fora dei comandi le barabe e i momoli, e de meterghe zente nova, seria e onesta. Rossi, neri, bianchi, domaci o foresti che i sia, manovài o profesori, omini o done, giovini o no, ma almeno seri e onesti.

Secondo, ricordeve che se volè lavòr presto e pel futuro, in porto inveze che pantigane ne ocori navi e merci. Ma per averli bisogna riativàr el porto franco, vecio e novo, e darghelo in man a specialisti veri che nel mondo miga no manca. E cazàr presto fora anca del porto tuta la ganga dei bubez e dei traiber strapagài per tignirlo in malora. Tuti i parasiti dela nostra zità e del nostro patìr, insoma.

No ocori che ve scrivo altro, cari fioi e fie mii, legitimi, ilegitimi o de qualchedun altro. Se capiré e ve daré de far, volerà dir che no sè mone e ve merité de cominciàr zà a star meio, come che spero. E se no, volerà dir che dovarò spiegarve tuto de novo el prosimo ano.

© 9 Marzo 2011